رئيس مجلس الإدارةنادية أمين
رئيس التحريرجودة لطفي
الإثنين 14 يونيو 2021 م 6:59 صـ 4 ذو القعدة 1442 هـ
الرئيسية | مقالات

نهى الصيفى تكتب نتجوز تاني ليه!! (3)

2021-01-03 18:21:30

الأحترام عامل أساسى لنجاح الجواز .

طبعا مهم جدآ وجود مشاعر حقيقية بين أى طرفين لكن الأهم وجود الأحترام كعامل أساسى مش ثانوى .

لو مافيش إحترام متبادل بينهم يبقى عمرهم ما هايقدروا يعدوا أى مشكلة تواجههم لأن بمنتهى البساطة كل واحد عنده رأى ومتمسك بيه علشان شايف انه صح وشايف انه لازم هو اللى يدير الشركة لوحده لأعتقاده الخاطئ انه الأجدر والأصلح فى الإدارة ومع الوقت يكتشف انه غلط لما اتعمد تجاهل الطرف التانى وبين له عدم الأحترام فى رفضه لمشاركته ولو حتى فى إبداء الرأى.

الأحترام عامل أساسى لانه بيأكد على حالة الراحة فى التعامل بين الطرفين احساس الأمان انه لو قولت حاجة حتى وإن كانت تافهه بعض الشئ فأنا متطمن أن الطرف التانى هايحترمنى وهايتقبل مشاركتى ويناقشنى بدل ما يرفض انه يسمعنى من الأساس .

الأحترام عامل أساسى لأنه بيدعم موقف الطرفين قدام الناس وبيدى ثقة وأهمية كبيرة لكل طرف لما يحس بأحترام الآخر له وبالتالى ده بيساعد فى إنجاح عقد الجواز .

الأحترام عامل أساسى لأنه من غير إحترام حقيقى بين الطرفين بتحصل مشاكل وحتى فى وجود الحب لأن الحب وقتها بيحس بضعف قدام عدم وجود الأحترام لأن إحنا اتفقنا أن الحب عامل مساعد مش أساسى زيى الأحترام علشان الجواز ينجح ويبقى نموذج مختلف .

بص حواليك هاتلاقى نماذج جواز كتير ناجحة لمجرد وجود الأحترام بين الطرفين مع عدم وجود الحب أحياناً لأن وقتها بيكون فى حاجة تانية إسمها العشرة والألفة والتعود الأحترام أساسى علشان تعرف تتناقش مع الطرف التانى من غير خوف او إحساس بالدونية او السخرية منك.

الأحترام عامل أساسى بيساعد كل طرف فى تحقيق طموحه وحلمه لما يلاقى الطرف التانى بيحترم ذكائه واحلامه وبيحاول يدعمه ويساعده مش يحطمه ويقصقص له جناحاته اللى نفسه يطير بيها .

الأحترام عامل أساسى فى علاقة الجواز علشان بوجوده بنحس بقيمتنا وبتقدير لكل حاجة بنعملها ونحس بالأمان والسند لما تحصل لنا مشكلة ونجرى نحكيها لشريكنا وقتها بنلاقى عنده إحترام لخوفنا وقلقنا واحساسنا للأحتياج احترامه ده بيقدم لنا الراحة وبيساعدنا نعدي المشكلة بطريقة مختلفة مع وجود المشاعر الطيبة بينا.

الأحترام عامل اساسى فى نجاح الجواز لأن بأختفاء الأحترام بينهم بتكون العلاقة حادة وفيها تحدى وترقب لكل طرف وإنتظار الخطأ لمعايرته وده مع الوقت بيقتل مشاعر الحب لو كانت موجودة او يقتل مشاعر العشرة والألفة لو كانت هى الركيزة اللى اتبنى عليها البيت ده.

الأحترام عامل أساسى وقت الخلاف أو الأختلاف بتبان حقيقة الإنسان وبنعرف مكانتنا الحقيقية عنده وقت الغضب والأنفعال ولو الأحترام موجود وقتها بس ممكن يعدى الخلاف ده من غير تبعات خطيرة لأن بأحترامه ليك وقت الغضب عمره ما هايقول أو يعمل حاجة تخليك تندم او تخاف أو تحس انك اتسرعت علشان كنت صريح وقولت انك محتاج تحس بالأمان .

انك تحترم الطرف التانى حتى لو مش بتحبه ده مهم لانجاح الجواز.

انك تحترم قراراته الخاصة ولو حبيت تناقشه فيها يكون بأحترام وتقدير ده بيساعد فى نجاح العلاقة.

انك تحترم خوفه وقلقه وغيرته وتوتره فى وقت الخلاف ده بيدعم موقفك لما تكون فى مكانه.

انك تحترم نفسك وتكون جبار للخواطر فى معاملتك للطرف التانى مهما شوفت منه ده بيساعده يتعلم منك ويكون عايز يحافظ على وجودك لأنك عرفت تحتويه فى وقت الغضب بأحترام ك لنفسك وله.

انك تحترمه قدام نفسه قبل الناس ده بيخليه ممتن لوجودك ويكون دافع للاستمرار.

الأحترام عامل أساسى مع وجود الحب كعامل مساعد ممكن جدآ ينجح عقد الجواز ده وتبقى شراكة متزنة وسط أقرانها ووارد جدا تنجح نجاح كبير لأن الشركاء فيها بيحترموا بعض وبيحترموا وجودهم سوا.

لكن لسه فى ركائز تانية لو اتوفرت آكيد هتساعد فى نجاح الجواز!!

هانحكى عنها المقال القادم .

 

 

0
مقالات
62476
جميع الحقوق محفوظة © 2021 - شبكة النايل الاخبارية