نائب رئيس مجلس الإدارة:محمد عزبرئيس التحريرجودة لطفي
رئيس مجلس الإدارةنادية أمين

نهى الصيفى تكتب نتجوز تانى ليه!! (4)

نهى الصيفى تكتب نتجوز تانى ليه!! (4)
2021-01-05 19:01:43

كلنا متفقين ان الجواز شركة بين اتنين وان أي شركة في الدنيا لازم يكون لها رأس مال يساعد على سد الاحتياجات المادية وتوفير متطلبات العمل داخل الشركة علشان تضمن استمرارها ونجاحها في سوق العمل ..

يبقى لازم نتفق على حاجة مهمة قوي؛ هي إن المادة عامل مهم ضمن عوامل نجاح العلاقة الزوجية ، وجود المال مش أساسي بس مهم ، بيوفر كتير وبيلخص في مشاكل كتير قوي ممكن تبقى عائق للاحساس بالسعادة واستمرار الجواز ..

خلينا نتفق الاول أن المال مش غاية لكن وسيلة ، ايوة طبعا ، وسيلة ؛ الهدف من وجودها السعادة والاحساس بالامان والراحة والطمأنينة وشوية حاجات كتير كده جنب بعض ، المال وسيلة لتسخير حاجات مهمة لخدمتنا وبالتالي هايتوفر عندنا وقت علشان نتفرغ للحب والمشاعر ووقتها هانعرف نساعد الشركة دي انها تستمر ..

انا عمري ما هانسى جملة سمعتها من واحدة اعرفها ، وهي بتشتكي من جوزها الرومانسي جدا ، بس مش عاجبها قلة امكانياته المادية ، وعلى حسب قولها " انا مش هاعيش بالرومانسية دي ولا هاركب عربية فيها تكييف بالحب " ، هي متطلباتها مختلفة عن ستات تانية ممكن جدا تفرق معاها رومانسية جوزها وحبه ليها وتستحمل ضعف الإمكانيات المادية في مقابل الحب والاحترام بينهم.. علشان كده بقول أن المال مهم بس مع وجود الحب والاحترام بيساعد ان العلاقة تنجح..

المال عامل مهم ، ماحدش يقدر ينكر أهميته في اي علاقة ، وصعب جدا أن اي حد يحاول تهميش دور المال في احساس السعادة حتى وان كان دور نسبي ..

مش بالضرورة يكون وجود المال بصورة كبيرة ، مش لازم يعني تكون ملايين بس اكيد برده جو عش العصفورة يكفينا ولقمة صغنونة تشبعنا ده مابقاش ينفع نعتمد عليه ونصدقه ، مش لانه كذب ومش حقيقي ، لأ ؛ لكن لان وجود المال مهم بجانب الحب علشان اكيد احنا مش هاناكل مشاعر ولا هانشرب احساس وطبعا مش هانلبس ضحك ولعب وهزار ولا هانتعالج بالرومانسية والحب ..

المال بيشتري الحاجات المادية اللي تخلينا مرتاحين و قادرين نحس طعم الحاجات التانية زي الاهتمام والمودة واحساس الأمان والراحة والسند ..

المادة عامل مهم ، جنب الحب كعامل مساعد ، والاحترام كعامل أساسي،

تخيل كده شكل الحياة الزوجية دي هايكون ازاي ؟!

تخيل كده شركة بين طرفين عندهم التلات ركائز دي هاتبقى عاملة ازاي؟!

تخيل كده بيت ، عايش فيه اتنين بينهم حب واحترام وعندهم مال قادر يساعدهم على احتواء اي ازمة ممكن يتعرضوا ليها او اي احتياج مادي ممكن ينغص عليهم السعادة اللي نفسهم يعيشوها سوا وكتبوا العقد لتحقيقها؟!

تخيل كده العلاقة بين اتنين ماعندهمش عُقدة نقص او احساس حقد للغير لمجرد وجود المادة اللي بتوفر جزء من السعادة؟!

تخيل كده احساسهم ببعض لمجرد قدرتهم على توفير او سد بعض الاحتياجات المادية البسيطة الطبيعية جدا الموجودة في اي بيت؟!

تخيل كده السعادة اللي هايعيشوها وهما متطمنين سوا؟! متطمنين ببعض ولبعض!!

قدرت تتخيل ولا لسه محتاج مساعدة؟!

اصل وقتها هي هاتشوفه سند حقيقي ليها ، وهو هايلاقيها ايد كريمة عليه مقدرة قوامته واحساسه بنفسه..

المادة عامل مهم علشان الجوازة تنجح ، وجودها مهم في وجود الحب والاحترام..

بس برده لسه مش كفاية علشان الشركة تستمر سنين وتحافظ على نفس المستوى.. الشركة بتكبر وبيزيد عدد الشركا فيها ولازم يكون في عوامل تانية تساعد على النجاح والاستمرارية..

هانكمل باقي العوامل فى المقال القادم..

 

 

أُضيفت في: 5 يناير (كانون الثاني) 2021 الموافق 21 جمادى أول 1442
منذ: 11 شهور, 1 يوم, 6 ساعات, 38 دقائق, 44 ثانية
0
الرابط الدائم

التعليقات

62534