نائب رئيس مجلس الإدارة:محمد عزبرئيس التحريرجودة لطفي
رئيس مجلس الإدارةنادية أمين

خيرية ومحمود

خيرية ومحمود
2019-09-17 01:18:35

محمووووود .....
سامعني يامحموووود. !!!
ايوه عارفة انك سامعني
بس عامل مش سامعني
...........مش شايفني
رغم انا جوه الحدود
قصدي انا كل الحدود
عاوزة منك بس كلمة
تكسر جوايا الجمود
أخرج بيها من حياتك
من حدودك ........
وفي حياتي .........
يبقي لك حدود
عاوزه اطلق يابعلي
عوزة أتحرر ياعمري
عمري أنا بقى محدود
شعري شاب جماله غاب
وشي مـن الكرمشه بقى يتعاب
عاوزه أدور عــ الأمل
والأمل حلمه بعيد
عاوزه الحق اللي فاضل
من اللي فيا .....
ارضي جفت من السكوت
مــن الصدود
من إهمالك اللي شبعني
بكاساته
م اللي انا بره حياته
م اللي أنا جوه حياته
بيني وبينه بنى سدود
محمووووود .......
عاوزه اطلق يابعلي
خيرية .......
انت صاحية ولا نامية
ولا عقلك صبح شريد
دا انتي أمي بالتبني
انت أختي وفيك دمي
انت بنتي وحتة مني
انت كل اللي فاضل لي
مش كلام ولا وعود
إنتي نبضي إنتي لساني
إنتي حاسة اللي بعاني
بس غلطتي سكاتي
كنت فاكر إني شايل
حمل عنك كان شديد
معرفش إن الحمل بات
صخرة سكات ......
موتت فينا العهود
ممكن مقولش إني بحبك
لكن في عشقك انا بدوب
غلطة مني بس و الله كأني
بشوفك اليوم من جديد
سامحيني ياغالية ياعالية
الكلمة مش هقدر اقولها
لساني ليها عاصي عنيد
محموووووود ......
ياخرابي .....معقول !!!
لسانك فك ومش مشلول
وقلبك بيرق وبيقول
وبتعرف تراضي وتعرف تهادي
حلو الكلام طب ليه ماتقول
قولي تعالي شيلي عني الحمول
مش عاوز غير تسمعني
فضفضة من غير عزول
طبطبي عليا. دادي
حضنك انت ليا وادي
مش هتكسف أكون عليل
اتكلم حسسني بوجودي
قووووول
مش عاوزة غير صوتك
يغني كلمة بحبك علي طول
مش عاوزة غير لقمة هنية
متغمسة بنظرة حنية
ساعتها راح أطير مــ الذهول
وأرجع بنت العشرين
وأطرح من عمري سنين وسنين
وأنسي خلفتي لبنات وبنين
مش هفتكر غير كلمتك
غير نبرتك وهاقول
محمووووووود
بحبك ياعمري اللي فات
وعمري اللي جي علي طول

أُضيفت في: 17 سبتمبر (أيلول) 2019 الموافق 16 محرّم 1441
منذ: 2 شهور, 27 أيام, 19 ساعات, 32 دقائق, 33 ثانية
0
الرابط الدائم

التعليقات

48618