نائب رئيس مجلس الإدارة:محمد عزبرئيس التحريرجودة لطفي
رئيس مجلس الإدارةنادية أمين

نوبة الغربه

نوبة الغربه
2019-09-10 23:05:29

نوبة الغربه
وجايز نوبة الغربة
تزور روحك وف حضورك
يكون دورك
مسافر بس رايح فين
وعينك
ف الوشوش باصة بتستغرب
واحساسك مكان اغرب
وتسأل مين
يجوز التوهة بتشدك
تشوف روحك بقت ضدك
ومشرط جرح الذكري
بايدين باردين
يجوز جدا تكون غيرك
في لحظة خوف
بتتمكن في تفكيرك
فتامر عقلك النايم او الصاحي
تبات نايم تبات صاحي
مغمض عين
مفتح عين
وشئ جواك من الرهبة
بيرفض فكرة الصحبة
يلف معاك ويحلفلك
بان ماحد يستاهلك
لا اخ بيسندك ضهره
ولا ذرية من اهلك
ويندهلك تروح وياه
تلم هدومك الدايبة
وتجري معاه مابتماطل
تداري الحق بالباطل
تشيل علي كتفك المطحون
سلاح مجنون
تشاور بيه علي نفسك
ورعشة ايدك الهاربة
بتضرب فيك كمان ضربة
تفوق نفسك من الغربة
علي موتك ولون الدم
وشيل الهم يحلالك
ويسكن كل اوصالك
نزيف ودموع
يبات الدمع متحني مع الحسرة
بقيت عايش بقيت ميت
ومين يدرى
طلاما روحك الغايبة هناك لسة
ماهيش حاسة
بغلطة عمرك الضايع
بقيت بايع
ومين يحميك ومن نفسك
عشان نفسك
عشان ترجع من المشوار
لازم لك تكسر الاسوار
مابين بينك
تداوي الشرخ بين النني
والنني تشوف عينك
تشوف الحق وتصيبه
وتمشي معاه وما تسيبه
تحس الروح بترجعلك
خطاوي الارض توسعلك
تدوس ع الصعب
يصبح سهل
تمد الايد سلام
بالحب لاخواتك
تشوف صورتك في ضلاية
لوجود ذاتك
تلم الاهل
وحبل الجيرة والصحبة يبات
موصول
بقية العمر في حياتك
سلام ع الغربة لما تطول
سلام ع القطر لو فاتك

أُضيفت في: 10 سبتمبر (أيلول) 2019 الموافق 10 محرّم 1441
منذ: 4 أيام, 15 ساعات, 27 دقائق, 58 ثانية
0
الرابط الدائم

التعليقات

48164