نائب رئيس مجلس الإدارة:محمد عزبرئيس التحريرجودة لطفي
رئيس مجلس الإدارةنادية أمين

”كيد النسا” قراءات في شعر العامية

”كيد النسا” قراءات في شعر العامية
أحمد اللاوندي
2018-09-22 20:20:14

للشاعر :أحمد اللاوندي

ضمن ثلاثة حواديت فى ديوان واحد 
تحت عنوان حواديت اللاوندى لاحمدراضى 
صدر سنة 1996
وارجوا ان تنال اعجابكم 
واعتذر للإطالة عليكم ولكم جميعا جزيل الشكر
كان من المفترض أن أنشرها على ثلاثة مرات ولكن 
وجدت من الأفضل نشرها دفعة واحدة حرصا على التواصل مع الأحداث

كيد النسا 
**********
ياقلبى صبرك بلاش السرعة واتأنى 
مش كل عاشق بيقدر يدخل الجنة 
ياما كتير ف الهوى إتلسوعوا بناره 
ولا حد منهم قدر بغرامه يتهنى
**********
تعا شوف حكاية جدع عاشق فقير م الريف 
فى الليل ياطول وحدته ونومه بقى تخاطيف 
واللى اتلسع م الهوى تختل أوزانه 
الحر يصبح شتا وربيعه يبقى خريف 
*****
اكمنه شارى بقى يفكر متين مرة 
مابين فقره وبين قلبه اللى بات برة 
وعاش أسيرحبها اللى انكوى بناره 
مبقاش يفرق ما بين الحلوة والمرة 
*****
ولما ذاد العذاب وطالت الوحدة 
خطبها من أهلها ولا حددوش وعدة 
شهرين تلاتة اربعة والواد بقى يعافر 
وعشان يجيب مهرها بيحوشها م المعدة 
**********
حماته شايفة الجدع منزلهاش من زور 
بتصتنع له القرف كل أما ييجى يزور 
وعشان تزيح الجدع و تجيب عريس تانى 
دايرة تقول ف البلد وافقت عليه بالزور 
************
واللى عرف قصته يقول البنت ملفوفة
وابوها راجل فقير والأم مهفوفة 
تندب على بختها وتقول دا هم تقيل 
انا اللى دون البشر ف الهم محدوفة 
**********
قام رد واحد وقال البنت مرغوبة 
وفقر ابوها مخلى الحلوة معطوبة 
وف شرعى أكل العطب للى ماطلش سليم 
واللى ما طلش البلح يحدفها بالطوبة 
**********
شخشخ بجيبه وطلع للمرة الصرة 
والمال يولد جشع ويرقص الجرة 
وبنالها فوق العشم قصر الهوى عالى 
بين يوم وليلة كان الدلعدى برة 
**********
نصب شباكه وقال الوقت من صفى 
ويقول كلام يعسله والخبث متخفى 
مالت دماغ المرة وإيد الشرممدودة 
وكل ضافر بيشرب دم متصفى 
**********
الخسة بانت وداس الندل على دينه 
ف السر هان الشرف والناس مأمنينه 
ولما طال رغبته زهد اللى كان مرغوب 
واتنخورت عفته ولاهمش طايلينه 
**********
عمل الخسيس عملته وفص ملح وداب 
هرب وساب البلد تنضح مرار وعذاب 
وتصب فوق المرة وبنتها الحيلة 
والغيظ يولد غضب ويتلف الأعصاب 
**********
مصيبة دقت نيرنها وشعللت فى الدار 
والرعب زق الفزع لحد آخر دار 
ولما شب الحريق بيفكروا يطفوه 
وكنت فين يافزع وهو لسة شرار 
**********
الحسرة دقت فى قلب الراجل الغفلان 
ابو البنية وجوز العقربة اللى إتهان 
رقد فى فرش المرض والحق خد حقه 
يارب زوف رحمتك قبل الغضب بزمان 
**********
البنت من يأسها تطلب لروحها الموت 
من زلت النفس اللى ما تخلى الليالى تفوت 
قعدت ف ريح امها وهى سهرانة 
بايتة تفكر فى تار البنت بالنبوت 
***********
قالو كتير قبلنا كيد النسا غلاب 
واللى يدوق لسعته يعمل له ألف حساب 
واش حال دا كيد من مرة مطعونة فى الغالى 
فقدت شرف بنتها ولا عادلهاش أحباب 
**********
قالت دى جت فرصتى والرك ع اللى يفوز 
إرمى الخشى وهلبى ياما فى الجيوب دى كنوز 
وخلى تارك لحد الفرصة متجيلك 
هفضى بير الألم لو هنضحه بالكوز 
**********
وعشان يهون الألم ويهدأ القلقان 
أنعم عليك ربنا بنعمة النسيان 
وكل شيئ إتنسى م الماضى بالتدريج 
والنار خلاص انطفت ولا عادلهاش دخان 
**********
بدأ الوداد يتفتل بينهم وبين الناس 
والجرح لمه الزمن واتغير الإحساس 
واتهد سور الجفا اللى اتبنا بينهم 
والمصطبة جمعت من القلوب أجناس 
**********
النية بايتة مرقدة ع الشر من بدرى 
ولسة قلب المرة من حقدها مهرى 
فى اللمة دخلت تدعبس على قلب يحميها 
لقت جدع عصبجى قالت إنسند ضهرى 
**********
ميال وعينة من المرة وبنتها الحيلة 
وليلاتى ع المسطبة ما يفوت ولا ليلة 
واخد السهر غيته والفتونة والكاس 
مع انه واد مقتدر وأصله من عيلة 
**********
ندهتله واستنظرت لما الجيران تنزاح 
وقالت له ع المسألة وسلاحها كان دباح 
تشكى الأسى اللى إنفرط وكسرة الخاطر 
صدق دموعها إنخدع واهى دموع تمساح 
**********
يحلف بشنبه وراس الجد ما يسيبه 
ياخد بتارها وتار البنت هيجيبه 
وفضى فكرك وسيبى الحمل للحمال 
دنا برضه سيد البلد وفتح لها جيبه 
**********
بصتله بصة مسهتنة ياحجبها المكسور 
بضحكة صفرة تضيع من عنيه النور 
ما يشوفش غير سحرها واللى تقوله عليه 
عايزة تشوف البلد الدم فيها بحور 
**********
وبات يفكر فى حال الحرمة واللى اتقال 
ياهلترى المسألة حقيقة ولا خيال 
آخد بتارها واغسل بالسلاح العار 
مدامها بتحبنى يبقى ما عدش محال 
**********
سافر يدور على الخاين وفات الدار 
لقاه مرافق مرة بتشتغل فى البار 
وهو واد بلطجى له صحبة تشبه له 
ساعت ماشافه ابتسم وقال هتولع نار 
***********
دخل وراح متفرد ع الكرسى بتآلط 
والمتر جه يسأله قال وسكى جك خابط 
وابعت ياواد المسا لفتوة الكباريه 
وقوله عمك وصل وتعالى نتعابط 
***********
وراح له يجرى وفاتح صدره متشوق 
دخل ف عبطه وكل كلامه متزوق 
والشرواقف فى صف اللى اشترى الحرمة 
وضربة اللى ابتدى بالشر ما تعوق 
*********
وضربة مطوة وفى التانية اتلقاه نايم 
شافوه زمايله اترمى والتانى بتآيم 
نزلوا عليه بالبلط خلوه حتت فى الحال 
وراح قتيل حبها وف دمه كان عايم 
**********
راح الخبر فى البلد عملوا مناحة عليه 
وجم قرايبه ولموا الجثة م الكباريه 
ولما عرفوا السبب قالوا نطرد الحرمة 
لازم تسيب البلد ولا فيش فى جيبها جنيه 
**********
هجموا على بنتها ضربوها ضرب الموت 
وهى زى القضى هربت من النبوت 
قام رد اخوه فى الغضب لازم هندبحهم 
لقى اللى قاله اختشى وان كنت راجل فوت 
**********
الشد بين الجيران وقرايب الراجل 
وصل لدرجة تخلى الكل يتقاتل 
بقى حزب ضد المرة وحزب وياها 
والفصل فى المسألة مابقاش من الساهل

أُضيفت في: 22 سبتمبر (أيلول) 2018 الموافق 11 محرّم 1440
منذ: 2 شهور, 23 أيام, 20 ساعات, 27 دقائق, 43 ثانية
0
الرابط الدائم
كلمات مفتاحية مقال خروف وطن

التعليقات

29220